☆ ° 。♪ KIKO's‧PaRaDise ♫。 ° ★

小妹我係2010年11月11號夜晚九點鐘左右正式回歸澳門ge懷抱啦！不過一出港澳碼頭就即刻開始抱怨，點解成條街咁多垃圾！點解d海水咁黑！oh~去左沖繩五日，實在正到令我樂而忘返呀~~~雖然今次去旅行係病住去，病住番，但沖繩呢個地方真係好適合度假！(撇除d yen超貴之外……)總括黎講，就係 I LOVE OKINAWA VERY MUCH LA！！！

第一日，即7號戈日，朝早六點起身，七點一個字已經到左港澳碼頭，等等等…坐八點半船去香港機場。今次好方便，因為D行李完全唔使自己拎，搭船前寄存左就一直到沖繩機場先拎，爽！第一次係香港機場由1號閘口行到70號閘口，真係幾攞命！嘩~個機場大到阿媽都唔認得，澳門戈個應該可以收皮…雖然路程長左少少，但勝在商店亦唔少，簡直就係威尼C機場版，乜名牌都有得賣，臨走都要撈番你地一筆！我地搭11:55機，原來只需要2個鐘，我即時精神晒！因為我好討厭搭太耐飛機…到左沖繩，降落係那霸機場，個機場其實都幾細，不過最搞笑係除左要打手指模，仲要影埋相，保安超嚴！過晒關之後我地搭的士去check in。嘩！500yen起錶，仲要已經係最平戈種的士！問你死未？差唔多係澳門ge 4倍，超金！去到酒店，總共千幾yen，突然發覺，沖繩d的士佬都幾好搵^^check in後，我地出去搵野食。由於日本比中國快一粒鐘，所以我地6點都未夠已經食晚飯。第一日我地去食海鮮，真係好鮮，樓下買完，樓上即煮，而且勁好味！不過當然又係金金金啦~好似要成一萬yen左右。食完野，行左陣街，好早就番左酒店休息囉。呢日，係五日行程最唔好ge一日，因為一落機已經落雨，而且落到夜晚都未停，搞到我地好擔心會影響之後ge行程。

第二日，11月8號，嘩！天助我也，陽光普照！呢日我地一早check out然後去OTS租車再去check in。呢間咁ge OTS真係超煩，收得又埋，租架車又要分別去幾個唔同ge counter先搞掂，不過最後都租到，唯一唔滿意係銀色車啫~不得不讚一句，日本d GPS真係好發達，跟住佢行左咁多日都冇乜誤差，唯一衰ge就係第一日帶左我地去山卡啦，差d搵唔到要去ge酒店，個GPS點左我地去對面山頭…第2晚同第3晚係住同一間酒店，我同米高第一眼見到間酒店就即時尖叫狂歡！天啊！無敵大海景！藍天碧海！壹號湖畔頂層都冇咁正呀~~我地間房係4樓，超大！有一間房四張床，仲有廚房同客廳添！我地4條友就好似突然同居咁，住係同一屋簷下，超開心^^擺好D行李後，我地揸車去親近大海lu…雖然水溫太低玩唔到潛水，但我地搭左船出海。遠睇係湖水藍ge大海，原來近睇都係咁藍，d水仲要清到阿媽都唔認得，完全係好似冇污染過，即使去到比較深ge地方，仍然好清晰咁可以見到海底ge熱帶魚、珊瑚同埋岩石！超靚！簡直就係一個自然海底博物館咁！然後我地再去戈舊白色ge觀光台，原來下面行落去可以睇到水底大約4米深ge景色，都係一個字形容：清！真係好靚呀！爽完一大輪，已經係當地ge五點左右，我地準備去覓食。沖繩出名食豬肉，我地去左一間位於山卡啦ge"大家"，呢間野d裝修超有日本古典風味，係一個木製ge榻榻米食店。不過最靚ge係我地坐ge位置，隔離就係一個小型瀑布，置身係真正ge大自然之中食飯我真係第一次(澳門戈d都係人工造出黎ge)，非常之有特色！雖然呢餐飯都幾貴，但有咁好ge環境同野食，值得ge！

第三日，係我地個個人影爆memory card ge一日！我地一早左食日本最出名ge拉面，果然係唔同d ga，超好味。跟住就去左海邊ge山頭睇自然風景，去睇好似桂林象鼻山ge大石，配上藍天碧海白雲，加埋大浪ge沖擊之下，更靚！戈日，我地仲見到有日本人著住傳統ge結婚禮服影結婚相添！不過我同米高最羨慕ge係…佢包到咁實，真爽，我地都就快比d海風吹到凍死啦！睇完風景影飽相後，我地揸左好耐好耐車，去參觀沖繩必去ge海洋博物館。同之前馬來西亞ge海洋博物館相比，沖繩呢個正好多！因為真係有震撼到我。呢座野除左海洋博物館外，亦有海龜館、海獅館、花卉館等等，竟然仲有海豚表演添！一樣，同香港海洋公園ge海豚相比，呢個亦係正好多！呢座海洋博物館之所以咁出名，因為佢有全世界最大ge玻璃水族館，我地第一眼見到戈度入面d超巨型魚，即時個口合唔埋。嘩！使唔使咁大條呀，條魚一張開個口，應該可以一次吞得落20個人，我真係未親眼見過咁大條ge魚囉，好震撼呀！參觀完，已經差唔多到黃昏囉，去買左d紀念品，就揸車去覓食啦。同樣，揸左好耐好耐車，最後到達美國街。呢度算係商場集中地，而且重點係間間都好有特色，真係好似置身係外國咁！我地又係去左食拉面，同樣，亦係非常之地道，非常之好味(突然覺得味千戈d唔好食)！食完野行左陣街，影下相，因為米高可能係今日吹得大多風凍親，所以唔舒服，我地就提早少少番酒店休息啦。

第四日，要離開藍天碧海酒店啦，超唔捨得呀！呢日係文化之旅，我地一早去check out，然後去左一間外表完全唔似食肆ge傳統日本料理店食早餐+中午。亦係一個字形容：正！個樣超靚超豐富之餘，仲勁爆好味！真係好滿足呀^^跟住我地去左一個日本舊時遺址參觀，雖然其實冇乜野睇，純粹係一道爛石圍牆，但戈度d風景實在不得了，藍天白雲係必然ga啦，仲有可以望到一大遍沖繩居民ge住宅，同澳門大炮台望過去ge高樓大廈相比，呢度感覺上更有悠閒，更舒服。睇完之後，我地去參觀今日文化之旅ge重頭戲---首里城。其實首里城相等於北京ge故宮，係舊時皇帝議政同埋居住ge地方，好有特色ga！日本人真係好愛乾淨，入館參觀竟然要除鞋，呢到又體現到文化ge差別啦。參觀完，我地就去最後一晚ge酒店check in啦。呢間酒店，亦係搵左好耐，因為GPS都冇顯示。幸好，最後都搵到。相比起前兩晚ge酒店，呢間ge房間比較細，不過同樣有4張床，而且風景亦一流！之前係露台望出去係藍天碧海海灘，而呢間係藍天碧海港灣。港灣內停泊左好多遊艇，感覺上d人好有米，而且我地check in時咁啱係黃昏，外面日落戈陣真係超靚！夜晚，我地去左一間外表好普通ge食店食飯，原來戈間係一間家庭料理店，佢D野都幾好食，好有媽媽ge味道。食完我地行左陣街，作最後衝刺去買埋d手信，就番酒店執行李，因為第二日要撇啦~嗚嗚T^T

回歸日，11月11號，朝早一早就起身，因為要玩埋餘下ge行程。自駕遊有一樣野係好好ga，平時去旅行最後一日通常要將行李寄存係酒店，到玩完之後再番黎攞，然後去機場。但自駕遊就可以將行李攞係架車度，一齊去玩再直接去機場，否則，番酒店再去機場，路程長之餘，又晒時間。我地呢日朝早係酒店食早餐，都幾多野食，味道亦唔錯。跟住就出發去玻璃工場啦，開頭諗住去整玻璃ga，但當地時間十一點先開始，我地怕時間唔夠去埋其他地方，所以都係算啦。玻璃工場d貨品全部都係手制玻璃，好靚！但一隻玻璃水杯圍番都要百幾二百蚊港紙，有d唔抵之餘，仲怕拎到番黎會爛，所以我地乜都冇買到。之後我地就去玉泉洞啦！玉泉洞係一個超級大ge洞，入面有好多以前地理書有睇過ge自然地理現象。不過入面好暗，有幾分恐怖。雖然我都有少少驚，感覺頭上一大堆密密麻麻ge箭形石柱好似隨時會跌落黎，但我興奮多過驚囉，因為第一次親眼見到呢d自然地理現象嘛！開頭米高唔敢入去，後來都跟住我地一齊行，不過戈度真係好大，好似行黎行去都行唔到出口咁，有d似尋寶ge電影。入面除左有石、仲有水，而且d水會係頭上d石柱滴落黎，搞到d衫同地下濕濕地。結果，我落樓梯戈陣一個唔小心，就比地下d水扇倒，個pat pat好痛呀><出左玉泉洞之後，我地去參觀埋附近ge地方。戈度原來亦有一間玻璃工場，而且有日本學生係度試整玻璃，我見到整玻璃d爐寫住1400度，即時O晒嘴，不過整玻璃真係一樣好神奇ge野，要好多步驟，造工亦要好細緻，d人真係勁呀！睇完呢個地方，我地就出發去機場附近ge OTS還車啦，還車前要先入滿油，當地油價都幾貴，入滿大約要400蚊港紙。還完車，就等OTS ge shuttle bus黎車我地去機場。我地搭當地時間16:30飛機番香港，降落戈陣係香港時間ge 18:10。跟住我地再坐20:00船番澳門，食埋野番到屋企，已經22:00囉！整個旅程，亦就此完結。嗚嗚T^T好唔捨得呀~點解時間過得咁快ga……

今次旅程，真係好開心，雖然係d yen最貴ge時間去日本狂比人話on居，但開心真係用錢都買唔到ga！11月，天氣唔熱唔凍，又有藍天白雲，去沖繩真係一流！今次我亦都見識到好多以前只係係書本先睇到ge野，所謂「讀萬卷書不如行萬里路」，呢句說話正正係今次旅行ge總結。日本人真係好有禮貌、好有修養，比台灣ge更好客，即使d野好貴，你仍然會因為佢服務太好而去買，因為唔買會自己覺得唔好意思。今次住ge地方，全部都好靚！我未試過住一間酒店係望海，而且仲係藍天碧海！每日朝早行出露台，都感覺到好fresh，即使每日都要好早起身，但仍然係好精神！而家米高佢地已經plan緊下年12月或後年1月ge北海道7日之旅，我真係好想join呀，我好鐘意日本呀~~^3^d