My Bling Bling Life --- Part 1 @ ☆ ° 。♪ KIKO's‧PaRaDise ♫。 ° ★

沉靜左幾個月，我又蒲頭啦！

呢段期間，我唔係唔想寫，內容日日都有諗，但就係懶！懶到出汁~冇恆心~冇毅力！成日掛住煲劇(呢個先係main point)~~

今日，突然有感~想發表一篇對於我目前興趣同喜好ge心路歷程(我講緊乜？)~

其實小妹我以前係一個乖乖學生，想當年(遠望…)放學番屋企最大興趣係上網ICQ(咸豐年代ge野)，戈陣亦係MSN開始流行ge時期，所以兩個都開晒黎傾計，其實都係同一班人啦，哈哈！而家諗起都幾無聊~

高中畢業後，去左屈記打工，認識到一堆豬朋狗友，即亦係而家ge七仔戰隊~其中YUMIKO同CINDY呢兩條友，日日係我隔離講台劇，仲要次次都講到好鬼死興奮。係高度感染環境下，由戈時起我就決定，為左同大家有更多ge話題，我係時候要去update下啦~

記得我第一套睇ge台劇係"惡作劇之吻"，亦從中發現左偶像劇呢一樣野原來係咁奇妙~咁吸引！從此之後，就一發不可收拾啦！

不過有時我又會諗，如果第一套睇ge唔係"惡吻"，而係其他可能冇咁好睇ge，我會唔會淪陷得咁深呢？每次出大陸，我總要買一大堆台劇番黎煲，煲到天昏地暗，差d連阿媽都唔認得。而家諗番起，其實都幾誇張！到目前為止，近年ge台灣偶像劇(不論紅唔紅)我都煲過晒咁滯，甚至有好幾套我覺得特別正ge我仲翻煲再翻煲添！煲劇成為左我人生最大ge樂趣^^

不過當中都有心酸ga，由於on檔ge台劇一星期只播一集，我個個星期係咁追，其實追得好痛苦。為左緩和冇劇播戈段期間ge情緒，我就去睇埋綜藝節目。果然，又走火入魔啦！有認真睇過台灣綜藝節目，就知同香港ge有咩分別。台灣ge藝人們比較敬業，而且尺度比較大，乜都可以講，不顧形象ge事都可以做，感覺同觀眾比較親近，呢d都有震憾到我。我甚至誇張到每日唔睇就訓唔著覺呢個地步，好可怕…

隨住煲台劇、追綜藝節目，慢慢鐘意埋佢地ge音樂。無可否認，台灣歌手ge質素其實幾高，唔係靠樣就可以出黎搵食，真係要有實力先會紅。呢一點，亦係衡量我鐘意一個歌手與否ge重要因素。由細到大，我鐘意聽歌、鐘意唱K、鐘意音樂，所以歌呢一樣野，係我生命中ge重要支柱。近年，由於自己有收入，所以有錢支持自己鐘意ge歌手，碟~買落一大堆(但歌仍然照用dn的…)，甚麼寫真集、影視集、戲劇寫真書、雜誌等等~都唔放過(有好多到而家都未睇過)，豪d甚至成千蚊一張飛ge演唱會都要去睇，仲去過好多次！外人睇黎，我係名副其實ge敗家女，但當中ge樂趣同滿足感，只有我自己同d fans先知道。不過我唔覺得我有幾過份，我只係用行動默默咁支持我鐘意ge偶像，又冇瘋狂到傾家盪產都要出國去追星咁誇張(雖然好想><)，所以我算係比較正常啦~

哈台呢條路線，一直走左四五年，我由乜都唔識，變到認得歌手、演員、主持、綜藝咖叫咩名、拍過咩戲、唱過咩歌、爆過咩緋聞。我諗我阿媽都就黎要喊囉，因為背書戈陣唔見我會咁好記性…由此證明左一樣野，興趣對於做一件事ge成敗係幾咁重要！(用力點頭)

不過近年韓風好得好勁，我發夢都冇諗過語言完全不通ge韓國，對我ge影響力可以咁大！我係"PLAY"(註：台灣偶像娛樂雜誌，一個月出一本，間中有出特刊，我一直買左5年囉~)ge熱血fans！

5年前買，講日韓明星ge版數真係五隻手指斬幾隻都仲數得晒。慢慢地，韓星攻佔三分之一、二分之一，甚至到而家ge大大半，根本就變左係一本韓國偶像娛樂雜誌！非常之滿足需要不斷update ge我~

上年暑假戈陣，我開始瘋狂迷上韓國。係我認知入面，最初對韓國有印象其實係更早，可以追溯到"藍色生死戀"、"天國的階梯"、"浪漫滿屋"(OH!原來我好老~)。由於當時年紀仲細，所以唔係好清楚內容講乜，純粹係"電視播我咪睇囉"ge心態，我淨係知韓國d戲大部分都好鐘意sad ending同喊喊喊…

到近年，勾起我條韓劇癮ge非"宮"莫屬啦！第一次覺得，原來韓劇係咁好睇，並唔係淨係識喊。

呢套"宮"，我一共翻煲左3次…可惜之後ge"宮S"接唔到"宮"ge人氣，雖然佢話同"宮"ge內容冇連接關係。記得當年睇"宮"睇到我上晒腦，連手機同電腦wallpaper都要用二王子金楨勛ge相，而家諗番起仲係覺得佢好靚仔~戲又演得好喎~唉~點解唔係男一呢…(離晒題添~回正題)"宮"重拾左我對韓劇呢樣野ge信心，後來睇左好多套，不論新野定舊野，只要網上d人話好睇，我就睇。例如"My Girl"(香港叫"大話妹"<--我好唔滿意呢個名，好貶義~)、"咖啡王子一號店"(我覺得唔係咁好睇)、翻煲"浪漫滿屋"(果然長大左先知咩叫浪漫)等等~

近年韓國大勢，所以我會由台灣偏去韓國都係正常ge~(我要in d~唔認老嘛)首先聲明：我唔係唔鐘意台灣哦，我超愛小豬同S.H.E ga！只不過台灣要睇ge劇我都睇晒咁滯囉，近排又冇乜新野好追，咁咪轉下口味囉…究竟我係點樣開始哈韓呢？其實係有一段故ge…(大家一齊45度角遠望)

話說早兩年韓版"花樣男子(流星花園)"紅到阿媽都唔認得，我又點可以唔睇下呢，唔係同人地邊有計傾呀。

認真睇落，其實還好，畢竟劇情同台版ge差唔多，但人物比台版ge靚仔靚女好多(F4 sorry啦)。其實我對佢ge男主角好感不大，反而男二~冇錯，又係男二！金賢重明顯靚仔好多，尤其剪短左個頭之後，點解d男二都靚仔過d男一ge呢…

我唔係話男一李敏鎬唔靚仔，只係佢個假自然捲好唔襯佢…由此可見，髮型對人黎講係幾咁重要！(再次用力點頭)呢個都唔係重點，重點係播到第13集ge時候，突然出現澳門議事亭、威尼斯人等地方，仲足足播左成兩集咁多添！其實"宮"最後一集都係澳門路環取景，只係地標唔明顯，我都係見到新福利巴士先知咋…反而"花樣"就去晒d地標ge地方拍攝，澳門旅遊業又更上一層樓啦~多謝！除左咁之外，"花樣"仲同我有d微妙ge緣份…話說當時臨近聖誕，我係新馬路(全澳門算係最有氣氛戈度)行街，點知見到一大堆人係度圍觀，我抱住一副睇八卦ge心態攝左入去，原來有人係度拍緊野。我見到一個身穿粉紅色西裝(同"海派甜心"小豬成日著戈件差唔多)ge金髮男子係度街頭彈結他賣藝賺錢，根住隔離有個阿叔不停咁丟d錢落個結他箱度…哦~原來係拍咁ge戲碼。

起初我以為戈個係日本男仔，黎澳門取景拍MV，因為佢個look好日系，斯斯文文又唔出聲咁。我發夢都估唔到後來我會瘋狂迷上佢，而且佢私底下竟然係一個無敵四次元男---賢重oppa！好老實講，佢反差大到有d嚇親我，完全同尹智厚係兩個人…可能係因為我由"花樣"開始接觸佢所以先誤以為佢好文靜……

後來睇左好多佢ge戲劇、綜藝節目、MV，發覺佢都幾搞笑，而且戈種搞笑係自然而然，唔係set梗ge~我係由"花樣"溫柔ge尹智厚開始認識金賢重，一直都以為佢好斯文同細心。當睇到"我結-生菜夫婦"入面變成脫線ge四次元小丈夫，我完全O晒嘴囉！

不得不提，佢同皇甫夫人拍埋一齊，真係好妙，兩個人嚴重瘋癲ge行為，每一集都笑到我個肚好痛，不過其實佢都有浪漫同體貼ge一面。可惜之後賢重要拍"花樣"，所以生菜要下車啦，皇夫人喊得好傷心，我都喊得好傷心呀T^T後來搵番SS501剛出道拍ge綜藝節目"謝謝你叫我起床"，一邊睇，我頭頂一邊有幾十隻烏鴉飛過。賢重竟然係"超級懶床王"，仲要係嚴重到令人髮指戈種！

↑SS501 謝謝你叫我起床 (左到右：政民-永生-賢重-奎鐘-亨俊)

奎鐘最乖，幾乎每次都一叫就起~老么亨俊總係淪為比哥哥們恰ge對象~永生非常注重頭髮管理~政民可以用三個字形容---"暴力王"。"謝謝你叫我起床"有兩大重點一定要睇，因為太好笑~一、賢重煮早餐，吹水吹到暈，死都將紅蘿蔔當火腿、炒年糕落中藥，礦泉水吹成南極冰雪融水…二、懶床大懲罰---超級大媽頭+恐佈化妝侍候！睇完只想講一句"賢重啊，你係偶像啊！形象去左邊呀？"

最近(都唔算好近)SS501 ge "LOVE YA"MV，令我眼前一亮！